Rasmiy ma`lumotlarga ko`ra, Tojikistondagi kam ta`minlangan oilalarga mansub yoshlar, talabalar va o`smirlarning aksariyati to`yib ovqatlanmaydi. Ularning moliyaviy ahvoli bunga imkon bermaydi.
Dushanbening markaziy ko`chalaridan birida joylashgan "Sadbarg” tijorat markazi hovlisida joylashgan oynavand do`konlar har doim tojikistonlik yoshlar bilan gavjum bo`ladi. Talaba qizlar va yigitlar, o`quvchilar bu do`konlardan issiqqina, eng muhimi, arzon bo`g`irsoq sotib olish imkoniga ega.
Qishloqdan poytaxtga o`qishga kelgan Faridaga dehqon otasi har hafta yuborib turgan 10 somoniy yoki taxminan 2,5 dollardan ortiqroq pul vitaminli issiq ovqat uchun etmaydi. Shuning uchun ham u tushlikka bo`g`irsoq egani aynan shu do`konlarga keladi. Ammo bunday "shohona tushlik” ham har doim bo`lavermaydi. Chunki ko`p hollarda Faridaning bir somoniy yoki taxminan 50 tsent mablag`i yo`lkiraga ketadi.
Uning o`rtog`i Nasibaxon mamlakat janubidagi Shahrituz tumanidan kelgan. U xorijlik yoshlardek kafe-barlarda nonushta yoki tushlik qilishni orzu qiladi. Ammo oilasi Nasiba uchun ajratgan mablag` bunga imkon bermaydi. U ham Faridaga o`xshab bo`g`irsoq bilan cheklanadi.
Tojikistonlik talabalar, xususan, yigitlarning eng yaxshi ko`rgan ovqati xalq orasida "serg`izo” nomi bilan tanilgan taom - qurtobdir.
Qurtob, asosan, yog`och idish yoki tovoqda tayyorlanadi. Idishga qatiq suyultiriladi, unga piyoz, ko`kat va patir non to`g`raladi. Bu mahsulotlar ustidan dog`lanib turgan zig`ir yog` quyiladi. Bu taom juda mazali bo`lish bilan birga arzon hamdir.
Tojikiston Milliy universiteti birinchi kurs talabasi Valiahmad 12 kishilik oila farzandi. Oilada faqat ota ishlaydi. Katta akasi pul topish maqsadida bundan to`rt yil avval Rossiya shaharlaridan biriga ketgan va hozirga qadar undan darak yo`q. Shuning uchun ham u har oyning ikki-uch kunida issiq taom iste`mol qilsa, qolgan kunlarini faqat qurtob yoki undan sal soddarog`i shakarob bilan o`tkazishini bildirdi.
"Otam bergan 8-10 somoniy qorinni o`ylasam, yo`lkiraga etmaydi, yo`lkirani o`ylasam, kuni bo`yi och yurishga to`g`ri keladi. Kiyim bosh haqida-ku, o`ylamasam ham bo`ladi. Bizning eng yaxshi ko`rgan va arzon taomimiz qurtob”, - deydi Valiahmad.
Uning kursdoshi Avaz esa to`yib ovqatlanmaslik va organizmida vitamin etishmasligi tufayli ba`zan hushidan ketib qolishini aytdi.
Vahdat tumanilik Roziya xola 6 farzandning onasi. Oilaning asosiy daromad manbai Rossiyada mardikorlik qilishdan keladigan tushum. Ammo Roziya xola oila ahli ertalab qand choy va non bilan nonushta qilishini bildirdi. Kamquvvat farzandlari kasallansa, tezda tuzalib keta olmasligidan kuyindi ayol.
Rohila xolaning aytishicha, mamlakatdagi ishsizlik, narxlarning yildan-yilga sun`iy tarzda oshib borishi bois, tojikistonliklarning aksariyati ana shunday qashshoqona hayot kechirishga majbur.
|
© 
hafa qivordila odamni Eshqobil va Mohidil 
