|
Prezidentimiz tashabbusi bilan mamlakatimizda yoshlar kamoloti, ta’lim-tarbiyasiga alohida e’tibor va g‘amxo‘rlik ko‘rsatilmoqda. Davlatimiz rahbari Islom Karimovning akademiklik gonorari va sovg‘asini Glier nomidagi Respublika maxsus musiqa akademik litseyining 4-sinf o‘quvchisi, shu yil oktabr oyida Italiyada o‘tgan yosh pianinochilarning o‘ttizinchi xalqaro "Le Musye” ko‘rik-tanlovi g‘olibi Tohirjon Asqarovga tantanali topshirish marosimida bu yana bir karra namoyon bo‘ldi.
O‘zbekiston Davlat konservatoriyasida bo‘lgan tadbirda musiqashunos olimlar, san’atkorlar, o‘qituvchilar, jamoatchilik vakillari, talaba-yoshlar ishtirok etdi.
Yoshlar tafakkuri va qalbiga chin insoniy fazilatlarni singdirish, ularni istiqlol g‘oyalariga sadoqat, ona-Vatanga muhabbat, milliy qadriyatlarimizga hurmat ruhida tarbiyalashda, ezgu ishlar sari da’vat etishda san’at, ayniqsa musiqaning o‘rni va ahamiyati beqiyosdir.
Davlatimiz rahbari Islom Karimov o‘zining O‘zbekiston Fanlar akademiyasining akademikligi uchun oladigan gonorarini Uspenskiy hamda Glier nomidagi Respublika maxsus musiqa akademik litseylarining iqtidorli o‘quvchilariga stipendiya sifatida beradi. Hozirga qadar mazkur stipendiyaga ushbu ta’lim dargohlarining Daniil Xoliqov, Nodir Hoshimov, Sherali Tursunmatov, Behzod Abdurahimov kabi iqtidorli o‘quvchilari sazovor bo‘lgan.
Endi ular safidan o‘n yoshli Tohirjon Asqarov ham o‘rin oldi. U dastlab mamlakatimizda o‘tkazilgan "San’at g‘unchalari”, yosh ijrochilarning respublika ko‘rik-tanlovlari, badiiy ijodiyot festivallarida muvaffaqiyatli ishtirok etdi. Italiyaning Agropol shahrida o‘tgan tanlov uning hayotidagi ilk xalqaro bellashuvdir. O‘n beshdan ortiq mamlakatdan vakillar ishtirok etgan mazkur ko‘rikda yosh musiqachimiz jahon va o‘zbek kompozitorlari asarlarini mahorat bilan ijro etib, eng yuqori balni olishga muvaffaq bo‘ldi.
Davlatimiz rahbarining stipendiyasini topshirish marosimida so‘zga chiqqan O‘zbekiston Davlat konservatoriyasi professori Marat Gumarov, yosh pianinochining onasi Zarifa Asqarova, Glier nomidagi Respublika maxsus musiqa akademik litseyi o‘qituvchisi Iroda Jahongirova yosh iste’dodlarni qo‘llab-quvvatlash borasida ko‘rsatayotgan e’tibori va g‘amxo‘rligi uchun Yurtboshimizga minnatdorlik bildirdilar.
Yosh musiqachini sharaflash marosimi poytaxtimizdagi Qoraqamish mavzeidagi Tohirjon yashaydigan xonadonda davom etdi. T.Asqarovga davlatimiz rahbarining sovg‘asi – pianino va zamonaviy kompyuter topshirildi.
- Tohirjon – to‘rt farzandimizning kenjasi, – deydi uning onasi Z. Asqarova.- Oilamiz a’zolari asosan energetika sohasida faoliyat yuritadi. Biroq barchamizning musiqaga ixlosimiz baland. Tohirning yutug‘i mamlakatimizda yosh avlod kamolti yo‘lida ko‘rsatilayotgan ulkan mehr va e’tiborning amaldagi samaralaridandir. Ana shu e’tibor va g‘amxo‘rlik uchun Prezidentimizdan juda minnatdormiz.
- Bunday ajoyib sovg‘a meni ruhlantirib yubordi, -deydi Tohirjon.
- Prezidentimizning bu tuhfalaridan men bilan birga dadam, oyim, o‘qituvchilarim, o‘troqlarim – hamma xursand bo‘ldi. Yurtboshimiz bildirilgan bunday katta ishonchni a’lo o‘qishim, yangi-yangi ijodiy izlanishlarim bilan oqlashga harakat qilaman.
Tadbirda O‘zbekiston Respublikasi Bosh vazirining o‘rinbosari R.Qosimov ishtirok etdi.
|
© 
