Бу натижа Ўзбекистон футболи учун катта ютуқ ҳисобланади. Сабаби бунга қадар икки бор ёшлар терма жамоаларимиз ЖЧларда қатнашиб гуруҳдан чиқа олмай қайтишганди. Евстафеев шогирдлари ушбу маррани забт этишди. Демак, Чехия - Ўзбекистон учрашувида киритилган голларни этиборингизга намойиш этамиз.
ЧЕХИЯ – ЎЗБЕКИСТОН – 1:2 (1:1)
Голлар: Лукаш Юлис 23 пен - Темур Ҳакимов 44, Аббосбек Махситалиев 73.
Жозеф Саплар: "Ўзбекистон термаси айёрлик қилишга жуда уста экан!"
Ўйиндан кейинги матбуот анжуманига Чехия ўсмирлар терма жамоаси бош мураббийи Жозеф Саплар чарчаган ҳолда кириб келди.
Мен жуда хафаман. Гуруҳдан чиқишни жуда ҳам истаган эдик. Ҳисобда олдинга чиқиб олганимиздан кейин мусобақадаги энг ёмон ўйинимизни кўрсата бошладик.
Мағлубиятдан сўнг бирор сўз дейиш қийин. Йигитлар имкон даражасида ўйнашди. Биз ўсмирлар ўртасидаги жаҳон чемпионатида илк бор қатнашяпмиз. Бу биз учун жуда катта тажриба мактаби бўлди. Биз Торреонда жуда яхши вақт ўтказдик. Шогирдларимга миннатдорчилик билдирмоқчиман. Энди уйга қайтамиз.
Ўзбекистон терма жамоаси ҳақида нима дея оласиз? Уларнинг ўйини сизда қандай таассурот қолдирди?
Аввало, уларни ғалаба билан табриклайман. Сўнгги 15-20 дақиқада бир нечта имкониятлар бўлди. Келаси ўйинда ҳам ғалаба қозонишларини тилаб қолман. Фақат битта маслаҳатим бор: Терма жамоангиз симуляция қилмасдан ўйнаса яхши бўлар эди. ФИФА бунинг олдини олиши керак. Биринчи ўйинда ҳам, иккинчи ўйинда ҳам ва ниҳоят бугун ҳам футболчиларингиз майдонда кўплаб айёрлик қилишди. Ахир футболкаларингизга "fair play" деб ёзиб қўйилган-ку. Менинг ўйинчиларим бир марта ҳам ётиб олгани йўқ. Ёшларга адолатли ўйин кўрсатишни ўргатиш керак.
Ўйиндан олдин шогирдларингизнинг тоби қочганлигини айтган эдингиз. Бугунги ўйин натижасига бу қай даражада таъсир қилди?
Кечаги матбуот анжуманида ҳам биз учун ҳеч қандай баҳона бўлиши мумкин эмас, дегандим. Бугун ҳам шу фикрдаман. Шогирдларимни қилган хатоси учун койимайман, сабаби бу ёшда улар хато қилишга ҳақлидирлар. Фақат уларга бу хатолар қандай оқибатларга олиб келишини тушунтираман. Токи бундай хатолар бошқа такрорланмасин. Бизни Торреон жуда илиқ қабул қилди ва бунинг учун барчага миннатдорчилик билдираман.
Чехия-Ўзбекистон ўйинидан сўнг терма жамоамиз бош мураббийи Алексей Евстафеев матбуот анжуманига юзида илиқ табассум билан кириб келди.
Бундай қийин учрашувдан сўнг одам ўзини жуда бошқача ҳис қилади. Хурсандчилигимнинг чеки йўқ. Шогирдларим билан фахрланаман.
Торреонда борган сари терма жамоамиз ишқибозлари кўпайиб бормоқда. Ишқибозлар жон-жаҳди билан бизга мухлислик қилишяпти. Бу эса бизга қўшимча куч ва иштиёқ бағишламоқда.
Кеча ҳам айтгандим, яна такрорлайман, бу ердаги ишқибозларга гап йўқ. Улар бизни тинимсиз қўллаб қувватлаб туришди. Шогирдларим ҳам буни ҳис этишди ва Торреонда ҳаммадан зўр эканликларини яна бир бор исботлашди.
Мен ҳамкасбимни тушанаман. Одам мағлубиятга учрагандан кейин ниманидир сабаб қилиб кўрсатиш керак. Бу унинг фикри. Шогирдларим "fair play"ни яхши тушунади ва унга риоя қилади.
Келаси ўйин яна Торреонда бўлади....
Бу шаҳар биз учун худди уйимиздек бўлиб қолди. Биз худди ўз уйимизда, ўз мухлисларимиз қаршисида ўйнаётгандекмиз. Бунинг жуда катта ижобий томони бор. Бунинг устига биз майдонга, иқлимга анча мослашдик.
Фурсатдан фойдаланиб, Ўзбекистондаги барча мухлисларга миннатдорчилик билдираман. Биз барчамиз сизларнинг уйқунгиздан воз кечиб бўлса-да, бизни қўллаб-қувватлаб турганингизни ҳис этиб турибмиз. Бунинг эвазига сизларга яна ва яна ғалабалар туҳфа этишга ҳаракат қиламиз.
манбаa: www.uff.uz
© 
hudo holasa o'zbekiston bayrog'ini yuqori kotariwadi! 
