Cho‘milish mavsumi ham boshlanib ketdi. Ko‘pgina qizlar sanoqli kunlar ichida ideal qomatga ega bo‘lishni istaydilar. Ammo, afsuski, yaxshi natijaga erishish oson ish emas. Maqsad sari eng asosiysi – kurashish uchun yaxshi vositalarni tanlash va yo‘ldan qaytmaslik kerak. Biz bugun sinalgan va 5 haftaga mo‘ljallangan parhezni taklif qilamiz. Ko‘rsatilgan muddatdan qo‘rqmang, chunki ushbu parhez sizni kam yeyishga yoki mutlaqo och qolishga majbur etmaydi.

Mazkur usulning asosiy tamoyili asta-sekinlik bilan, ammo muntazam ravishda ortiqcha kilogrammlardan xalos bo‘lish va siz istagan qomatga ega bo‘lishdan iborat. Ushbu parhezga amal qilar ekansiz, dastlabki vazningizga qarab, 15 kilogrammgacha vazndan xalos bo‘lishingiz mumkin.Quyida so‘z boradigan usul ko‘pchilikka Kim Protasovning parhezi nomi ostida ma’lum. Istalgan miqdordagi sabzavotlar va yog‘liligi 5 foiz bo‘lgan sut mahsulotlari asosiy oziq-ovqat mahsulotlariga kiradi. Bunday ozuqaning afzalligi shundaki, sutkaning istalgan vaqtida ovqatlanish mumkin. Choy va qahvani esa, albatta, qandsiz istaganingizcha ichishingiz mumkin. Suvning tavsiya etiladigan miqdori – kuniga kamida ikki litr. Menyuni kuniga bir nechta olma bilan xilma-xil qilish mumkin.

Ratsion:                                           

1 va 2 hafta: faqat pishirilmagan yangi uzilgan sabzavotlar, pishloq, yogurt. Kuniga bir dona qaynatilgan tuxum yeyish mumkin.

3-hafta: sabzavotlar va sutli mahsulotlarga 300 gr qovurilgan yoki qaynatilgan mol go‘shti, parranda yoki baliq go‘shtini qo‘shish mumkin, pishloq va qatiq iste’moli bir oz cheklanadi. 

4 va 5 hafta: sabzavotlar, sut mahsulotlari, go‘sht, tuxum, olma iste’mol qilishda davom eting. Bu haftalar ichida organizmdagi ortiqcha yog‘ning (aynan yog‘ning) yo‘qolishi juda faol kechadi.

Sizni ratsionda un mahsulotlari yo‘qligi bezovta qilyaptimi? Ishonavering, ulardan voz kechish juda oson bo‘ladi. Dastlabki bir necha kun yengil va tez o‘tib ketadi. Birinchi haftaning oxiriga kelib, biror bir zararli mahsulotni yegingiz kelib qolar, ammo qorningiz to‘q ekan, siz un mahsulotlari tomonga hatto qiyo ham boqmaysiz.

Sut mahsulotlari va sabzavotlarni iste’mol qilish 40% ga 60% nisbatida bo‘lishi lozim.

Ushbu parhez go‘shtni yaxshi ko‘ruvchilar uchun bajarib bo‘lmaydigan vazifaday tuyulishi mumkin. Ammo aytish joizki, go‘shtsiz kechgan ikki hafta organizm uchun foyda keltiradi. Dastlabki bir necha kun sizni organizmda yig‘ilib qolgan ortiqcha suv va zararli moddalardan xalos etadi. Uchinchi kuni va keyingi haftalarda tanangiz aynan ortiqcha yog‘ qatlamlaridan xalos bo‘la boshlaydi.

Besh haftadan so‘ng, ushbu parhezdan chiqish uchun sizga taxminan yana shuncha vaqt kerak bo‘ladi. Parhezdan chiqish jarayoni asta-sekin, ratsionga boshoqlilardan tayyorlangan bo‘tqa, o‘simlik yog‘ida tayyorlangan sabzavotli ragu va shunga o‘xshash taomlarni qo‘shish bilan amalga oshiriladi. Parhez davri davomida siz organizmingizni to‘g‘ri oziqlanishga o‘rgatasiz, moddalar almashinuvini tezlashtirasiz, sog‘lomroq bo‘lasiz va ajoyib qomatga ega bo‘lasiz.

Parhezning yana bir ijobiy tomoni – quvvatingiz oshadi, demak, jismoniy mashqlarni yengillik bilan bajarasiz.

Kim Protasov parhezi to‘yimli va samarali, ammo har qanday parhezdagi kabi alohida kayfiyatni va judayam kuchli o‘zgarish istagini talab etadi.