2010-yili sodir bo’lgan janubiy Qirg’iziston fojeasi insonlar xotirasida og’riqli nuqta bo’lib hali uzoq yashaydi. U keltirgan og’riqlar, ayanchli oqibatlar hali-hanuz yuzlab, minglab insonlarga azob bermoqda. Fojeada ko’plab begunoh insonlarning yostig’i quridi, minglar insonlar mayib-majruh bo’ldi. Millatchilikning manfur og’usi bilan zaharlangan olomon yoshu-qari, erkagu ayolni ayamay, barchani birma-bir yo’q qilishga tushdi. Millatchilarning daydi o’qiga uchgan, lekin omon qolganlar orasida besh yoshli qizaloq Kubro ham bor…

Kubro haqida otasi tayyorlagan video

Muhammadqodirova Kubro 2005-yilning 1-noyabrida tavallud topgan. 2o1o-yil fojeasi ro’y berganda hali yomonlik nima ekanini tushunib ham yetmagan, endi o’ynab-kulib, ota-onasini xursand qiladigan ma’sum bolakay yoshida edi.

2010-yilning 19-may kuni Qirg’izistonning Jalol-Obod viloyati Suzoq tumani Ichki ishlar bo’limida ro’y bergan otishma chog’ida Kubroning qorniga o’q tegib, jigari va umurtqasiga shikast yetadi. Qizchani nogironlikdan saqlab qolish uchun hukumat yordami bilan Rossiya Federatsiyasida jarrohlik amaliyoti o’tkaziladi, umurtqasiga metal parchasi o’rnatiladi.

Kubroning otasi Muhammadsodiq aka 2-guruh nogironi. Bir oyog’i yaxshi ishlamagani uchun hassaga tayanib yuradi.

"O’zimni qaratishga imkoniyatim yo’q bo’lganligi uchun o’zim hassa bilan yuraman, bir oyog’im ishlamaydi — deydi Muhammadsodiq aka. — Qizimni menga o’xshab nogiron bo’lib qolishini eslasam, ko’nglim orqaga tortib, bu dunyo ko’zimga qorong’u bo’lib ketmoqda”.

Muhammadsodiq aka hozir Rossiyada. Bu yerga qizi Kubroni davolatish uchun olib kelgan. Ammo moddiy tomondan qo’li kaltalik qilib, hanuz kerakli tibbiy muolajani amalga oshirishning imkoniyati bo’lmayapti. Fojeaning begunoh qurboni bo’lgan Kubroni to’la davolatish uchun barcha kerakli yordamni berishni va’da qilgan Qirg’iziston hukumati o’z va’dasining ustidan chiqmadi.

Kerakli tibbiy muolajani o’z vaqtida olish lozim bo’lgani uchun qizining sog’lig’idan jiddiy tashvishga tushgan Muhammadsodiq aka "Vatandosh”ga maktub yozib, o’zbekistonliklardan va barcha yaxshilardan yordam umid qilmoqda.

"Vatandosh” gazetasi ijodiy jamoasi savob ishga qo’l urib, Alloh roziligini topish umidida bo’lganlarni qizaloq Kubroga yordam berishga chaqiradi.

Muhammadsodiq akaga to’g'ridan-to’g'ri bog’lanib, yordamni u kishining o’ziga yetkazmoqchi bo’lganlar uchun: