Ўйин майдон эгаларининг ташаббуси остида бошланди ва футболчилар рақиб дарвозаси томон хавф солишга уринишди. Аммо майдон марказида ўйин у қадар қовушмади. Айниқса, ҳужумчиларни сўнгги пас билан таъминлаш борасида камчиликлар кўзга ташланди. Шу боис, аксарият ҳужумлар қанотдан Жасур Ҳасанов ва Ислом Иномовлар орқали ташкил этилди. Ўзбекистон терма жамоаси аъзолари биринчи бўлимда Мажид Носир дарвозаси олдида икки бора чинакамига хавфли вазият содир эта олишди. Дастлаб, Ҳасанов ошириб берган тўпни Александр Гейнрих ўзига тўғрилаб олиб, учта футболчини чалғитган ҳолда зарба йўллади, аммо чап оёқ билан берилган зарба кучсиз ва дарвозабоннинг шундоқ қўлига келиб тушди. Кейинги ҳужумда ҳам Гейнрих иштирок этди. У билан курашда рақиб ҳимоячиси йиқилиб тушди ҳамда "Пахтакор” ҳужумчиси тўпни Одил Аҳмедовга ошириб берди, лекин Аҳмедовнинг зарбасига дарвозабон тўғаноқ бўлди.

Иккинчи бўлимда ҳам ўйин сценарийси шу тариқа давом этди. Миржалол Қосимов ўз шогирдларига танаффус пайтида керакли кўрсатмаларни берди. Оқибатда, йигитлар стадионга йиғилган минглаб мухлислар учун астойдил ҳаракат қилишди. Аммо кўплаб ҳужумларни якунлайдиган футболчи топилмади. Буни пайқаган мураббийлар Баҳодир Насимовнинг ўрнига Фарҳод Тожиевни майдонга туширишди. Лекин ҳисобни очиш учун яна ўша Гейнрихда имконият юзага келди. Ўнг қанотдан Сервер Жепаров узатиб берган тўпни "Пахтакор” ҳужумчиси тўхтатмасдан дарвоза томон йўллашга уринди, бироқ зарбага аниқлик етишмади. Ўйин якунланиб боргани сари мезбонлар шошилишарди. Сречко Катанец жамоаси эса, аксинча мағлубиятга учрамаслик учун ҳар қандай ҳунарларини ишга солди. Шунга қарамай, терма жамоа сардори Жепаровда беллашув тақдирини хал қилиш учун яхши имконият юзага келганди. Афсуски, унинг чиройли тарзда йўллаган зарбаси дарвоза устунига тегиб қайтди. Бу учрашувнинг иккинчи қисмида содир этилган энг хавфли вазият эди. Ҳакам томонидан асосий вақтдаги тўхталишлар учун қўшиб берилган дақиқалар ҳам поёнига етиб бораётган бир пайтда арабларда тезкор қарши ҳужум учун қулай фурсат туғилди ва улар 90 дақиқа давомида юзага келган биргина чинакам хавфли вазиятни гол билан якунлашга эришишди. Амирлик футболчи қанотдан тезкорлик билан Анвар Ғофуровдан қочиб кетди ва жарима майдони ичидаги Султон Ал Менхолига тўпни узатиб берди. Иккинчи бўлимда майдонга туширилган ҳимоячи эса, унга қаршилик кўрсатган ҳимоячи ва дарвозабон Игнатий Нестеровни доғда қолдиришга эришди...

Натижада, учрашув сўнггидаги ушбу биргина хато Ўзбекистон терма жамоаси учун қимматга тушди. Гарчи, Қосимов шогирдлари муддатидан илгари Осиё чемпионати йўлланмасини нақд қилиб қўйишган бўлишсада, йилнинг дастлабки учрашувида мағлубиятга учраш аламли бўлди.
Осиё чемпионати-2011 саралаш босқичи
ЎЗБЕКИСТОН – БАА 0:1 (0:0)
Гол: Султон Ал Менхоли (90+3)
Ўзбекистон: Игнатий Нестеров, Виталий Денисов, Анзур Исмоилов, Анвар Ғофуров, Ислом Иномов, Азиз Ҳайдаров, Одил Аҳмедов, Жасур Ҳасанов, Сервер Жепаров (с), Баҳодир Насимов (Фарҳод Тожиев, 62), Александр Гейнрих (Тимур Кападзе, 81)
БАА: Мажид Носир, Фарис Жума, Волид Аббос, Ҳамдан Камоли, Юсуф Ҳаммади, Фаҳад Масъуд (Султон Ал Менҳали 61), Субайт Хатир (Аҳмад Ҳалил 85), Амир Муборак, Али Ал Веҳайби, Муҳаммад Шеххи, Саид Ал Кас (Саид Салим Хатири 57)
Огоҳлантиришлар: Гейнрих (26), Амир Муборак (31), Жепаров (54), Муҳаммад Шеххи (81).
Ҳакамлар: Ҳасан Шамсуззамон, Маҳабубур Раҳмон, Аманат Али Ҳалдер (Бангладеш)