Эй Инсон, Аллоҳ сенга тўрт оёқлилардан ажратиб турувчи АҚЛ неъматин ато этди... Икки йўлни бирдек бериб қўйганини, қайсисини танлашда ихтиёрли эканингни кўрсатди.. Ё Ҳақ йўлини танлаб чин маънода бахтли бўласан... Ёки ўзгасини танлаб, чин маънода бахтиқаро ўласан... 

Имтиҳон ва синов юзасидан Ҳақ Йўлни қийинчилигу шиддат-ла ўради... Нотўғрисини эса роҳату шаҳват-ла қуршади... Қисқа, оний ҳаётингда қиладиган бир ҳовуч яхши амал эвазига чексиз, абадий роҳат ҳаётини ваъда қилди... Ўзинг ўйла... Фикрингни оч.. Дунёдаги 60-70 йиллик ҳаёт билан Охиратдаги чеки йўқ, охири йўқ ҳаёт тенгми? Ахир Сен ҳозирги тараққиёт дунёсида, арифметикаю математика чўққига чиққан оламда яшаяпсан, ошингни ошаяпсан... Наҳотки, шу ўткинчи дунёни деб, охиратингдан воз кечсанг... Ҳаётингнинг барини беҳудага сарф этиб, чексиз азобу уқубат, абадий заҳар-заққум ичсанг... 

Ахир сендан талаб қилинаётган нарса жудаям енгил, жуда оз нарсаларку... Сендан умрингнинг ҳамма лаҳзаси бошинг саждада ўтсин, дейилаётгани йўқ... Сендан Буюк Аллоҳга иймон келтирилиб, шу иймонга далил сифатида кунда беш маҳал енгил (10 дақиқалик, 5га кўпайтирсанг 50 дақиқа) ибодат талаб қилинмоқда... Қолган вақтингда ўзингнинг оддий ҳаётингни (Ислом белгилаган инсонийлик меъёрлари асосида) давом эттиришинг мумкин.. Бор-йўғи саноқли дақиқаларни Раббинг учун ажрат... Абадий бахт, абадий роҳат учун наҳотки шу саноқли дақиқаларни ажрата олмайсан... Ахир, бу ўзинг, фақат ўзинг учун фойдаку... 

Сенга чиройли шакл берган, идроку ақл берган, кўриш учун ўткир кўз берган, сўзлаш учун бурро тил берган, ширину аччиқни, ҳидлию сассиқни ажратадиган сезги аъзоларини тортиқ этган Яратганингга, Валинеъматингга, Хўжайинингга бўлган муомаланг шу бўлдими энди... Ичсангу ётсанг, есангу хуррак отсанг... Дунёдаги ишларинг учун елсанг, югурсанг... Ўтирсанг, турсанг... Ҳаётинг шу билан тугаса... Шуми тирикликдан бўлган мақсад... Шуми яшашдан мурод... Асло!

Сен имтиҳонда ўтирганингни унутма! Бу дунёнинг охират учун кўприк эканини эсда тут! 

Мен ичимда иймон келтирганман, бўлади шу, деб ўзингни алдама... Шайтон йўлига учма... Зеро, ўзинг яхши биласан... ақл ила мулоҳаза қиласан... Бир нарсани исбот этмоқчи бўлсанг, унга далил зарур... Бинобарин, иймонинг учун ҳам ҳужжат керак бўлур... Аллоҳнинг бору бирлигига, охират ҳақидаги ваъдаси аниқ ва ҳозирлигига иймони бор одам, Уни яхши кўрган инсон яхши кўрганининг айтганларини ерда қолдирмайди... 

Фараз қил... Бировни чин дилдан яхши кўрдинг, уни дунёда барчадан афзал билдинг... Унга шу севгингни изҳор қилдинг... Аниқки, бунинг сохта эмаслигини исботлаш учун барча нарсага тайёр турасан... Севгинг ҳақлигини уқтириш учун ўзингни ўтга-да, чўққа-да урасан... Нима деса қилишга, нимани сўраса опкелишга ҳозир бўласан...

Хўш, "менинг Аллоҳга иймоним бор" деган даъвога далилинг қани... Ҳужжатинг қаерда... 

Билгилки, Қиёмат ўйин эмас... У шундай кунки, ўша кундаги азобдан қутулиш учун киши барча нарсага, отасию онасини, акасию опасини, ўз турмуш ўртоғинию қавму қариндошини, балки бутун дунё аҳлини фидо этишга тайёр бўлиб қолади... У кун ваҳшатию даҳшатидан "Оҳ, кошки дунёда яхши амал билан ўтганимда эди...! Кошки тупроқ бўлиб, йўқ бўлиб кетсам!" деб орзу қилиб қолади.. Лекин, ҳайҳот! Ўша кунда бу афсусу надоматлар, оҳлару дийдиёлар фойда бермайди...

Дунёдаги ҳаром-ҳаришта ишлар, фисқу фасод юмушларнинг бирортасини қилмаган бўлганини орзу қилади... Лекин бу орзулардан наф йўқ... 

Шундай экан, бу имтиҳонда қадаминг билиб бос... Ҳали ҳамма нарса олдингда... Аллоҳ шундай марҳаматли зотки, қилган ишингга тавба қилиб, ибодатни холи адо этсанг, гуноҳларингни барини ювиб юборади, балки, бул гуноҳларни савобларга айлантириб юборади.. Юқорида айтилганидек, бир неча лаҳзалик ибодатни астойдил, чин юракдан адо этиб, эзгу ишларни қилсанг, охиратни, қиёматни мақсад деб билсанг, марра сеники.. Эстафета сенда кетади.. Йўқса, азиз умринг бекорга кетади... Ваъда этилган азоб сенга етади... 

Сайфуллоҳ Носир