Тошкент вақти билан соат 14:00да "Жар” стадионида жудаям катта воқеа ўринга эга бўлди.
"Жар” стадионида 8000дан озгина ошиқроқ томошабинга мўлжалланган ўтиргичлар мавжуд. Лекин бугун арена ўз бағрига тахминан ўн тўрт минг атрофидаги ишқибозни сиғдирди. Туриб томоша қилиш мумкин бўлган жойларнинг бирортаси ҳам эгасиз қолмади. Яна ташқарида минглаб мухлислар Криштиану Роналдунинг кўргазмали чиқишларидан айрилиқ ҳолатда қолишди. Ҳақиқий футбол юлдузининг ташрифи ишқибозлар орасида қандай каттакон ажиотаж уйғотишини мана бугун кўрдик. Буни оддий гаплар билан ифода этиш жудаям мушкул. Ушбу қувончли онлар эса ўзбекистонлик футбол мухлисларига "Ўзбекистон маданияти ва санъати форуми” жамғармасининг "Ёш футболчиларни қўллаб-қувватлаш дастури” доирасида тақдим этилди.
Лиммо-лим тўлиб-тошган "Жар” стадионида мухлислар бугун ҳақиқий шоуга гувоҳ бўлишди. Криштиану Роналдуни кўргани пойтахтга шу куни Ўзбекистоннинг турли бурчакларидан фанатлар келганларини мастер-классдан олдин ўтказилган викторина яққол кўрсатиб берди. Роналдунинг фаолиятига доир савол-жавоблар конкурсида эсдалик совғаларини ютиб олган футбол ихлосмандларининг истиқомат жойларига эътибор беринг: Қўқон, Тошкент, Нукус, Сурхондарё... Бир сўз билан айтганда, меҳмонлар географияси бутун Ўзбекистонни қамради.
Майдонга кун қаҳрамони Криштиану Роналду чиқиб келганда "Жар” ларзага келди. Роналду ҳайқириқ ва олқишларга кўмилиб кетди. Сўнг у ўзининг тўп билан супермуомаласини бирин-кетин кўрсата бошлади. Унга шериклик қилган, "Бунёдкор” футбол академиясининг энг донги кетган тарбияланувчиси, 12 ёшли Шоҳжаҳон Ҳасанов ҳам жаҳон футболи юлдузидан қолишмасликка ҳаракат қилди. Ишқибозларнинг реакцияси бўйича Шоҳжаҳон унга юклатилган вазифани қойилмақом тарзда бажарди.
Кейин майдонда "Бунёдкор” футбол академиясининг 1995 ва 1996 йилларда туғилган футболчилардан иборат жамоалари ўзаро баҳслашишди. Криштиану иккала жамоа сафида бир бўлимдан тўп сурди. Ўйин давомида у кўп бор ишқибозлар бунгача фақат ТВ орқали баҳра олишган финтларини намойиш қилди. Жаҳоннинг 2008 йилдаги энг яхши футболчиси ижросидаги ҳар бир чиройли ҳаракат гулдурос қарсаклар билан қарши олиниб турди.
Криштиану Роналду мухлисларга унинг дастхати туширилган эсдалик коптокларини улоқтирганда эса усиз ҳам хурсанд томошабинлар орасида бундан-да бахтиёр фанатлар аниқланди.
Бугунги тадбир мухлислар хотираларида ҳали узоқ-узоқ йилларга мухрланиб қолиши турган гап. Бу даражадаги ажиотажга ўзбек футболи тарихида кўпчилик ҳали гувоҳ бўлмаган эди.
(ФИФА версиясига кўра, 2009 йилдаги энг чиройли гол муаллифи эртага тонг сахарда Тошкентдан Лиссабонга учиб кетади.)
© 
:57: 
