Odatda, dog'lar tug'ruqdan keyingi dastlabki hayzdan so'ng yo'qoladi, ammo ba'zida ular butkul yo'qolishi uchun uzoq vaqt kerak bo'ladi. Ko'p hollarda sog'liqning yomonlashishi va pigment dog'lar paydo bo'lishi o'rtasida aniq aloqa kuzatiladi, xususan pigment dog'lar paydo bo'lishiga foliy kislotasining yetishmovchiligi, shuningdek jinsiy organlar, buyrak usti bezlari yoki jigar kasalliklari sababchi bo'lishi mumkin. Shu bois agar dog'lar tug'ruqdan keyin yo'qolmasa, ona o'zini xavfsizlantirishi maqsadida yashirin kasalliklar bor-yo'qligini aniqlash uchun shifokor ko'rigidan o'tishi lozim. Chunki endi uning chaqalog'i bor va undan bolani dastlabki oylarda parvarish qilish uchun ko'p kuch va quvvat talab etiladi.

Agar pigment dog'larning sababchisi foliy kislotasining tanqisligi bo'lsa, ratsionga ko'plab sabzavotlar, salatlar, ismaloq va karam qo'shish zarur.

Agar dog'larning sababi sog'liqdagi buzilishlar bilan izohlanmasa, unda yordamga yuz uchun oqartiruvchi kremlar keladi. Krem tanlaganda ularning ba'zilari tarkibida chaqaloq uchun xavfli bo'lgan va hatto ona sutining sifatiga ta'sir ko'rsatuvchi zararli moddalar borligi haqida unutmang.

Shuningdek, mutaxassislar uzoq vaqt oftobda yurmaslikni va terini juda puxtalik bilan quyoshdan himoyalovchi vositalar yordamida himoya qilishni maslahat berishadi, chunki quyosh nurlari tufayli dog'lar qorayadi va o'lchami kattalashadi.

Terini oqartirish uchun tabiiy vositalar

Yangi uzilgan bodring suvi, limon, boshpiyoz, klyukva, qizil smorodina, petrushkaning suvi (qaynatmasi) bunda sizga katta yordam beradi. Momiqli tampon yuqoridagi meva-sabzavotlardan birining suvi bilan shimdiriladi va dog'lar artiladi. Keyin meva-sabzavotlarning suvi singishi uchun teri xona haroratida quritiladi. Mevalar suvining ta'siri kimyoviy pilingga o'xshaydi, faqat minimal tarzda.

Dog'larni salitsil kislotaning 2-3% li eritmasi bilan artish mumkin.

Bundan tashqari, yerqalampir (xren) ham terini oqartirishga yordam beradi. Qirg'ichdan o'tkazilgan yerqalampir 8% li sirka eritmasida 2-3 kun davomida xona haroratida saqlanadi, keyin esa dokadan o'tkazilib, olingan eritma bilan dog'lar artiladi.

Asal va limon suvidan malham (bir dona limon suviga 2 osh qoshiq asal qo'shiladi). Toza lattaga hosil bo'lgan limon-asalli eritma shimdiriladi, keyin u yuzga qoplanadi va 20 daqiqa ushlab turiladi. Zarur vaqt o'tganidan so'ng yuzni iliq suvda yuvib tashlash kerak.

Xamirturushli niqob. Niqobni tayyorlash uchun 1 osh qoshiq sut, 25 gr xamirturush va 1 choy qoshiq limon suvi aralashtiriladi. Niqob teriga suriladi va 20 daqiqadan so'ng yuvib tashlanadi.

Pigment dog'larini yo'qotishda ilk ayozlarda biroz yaxlagan kalina juda yaxshi yordam beradi. Ushbu meva suvini yuzga surish kerak.

Shirin bulg'or qalampiridan tayyorlangan niqob. Bulg'or qalampiri plastik qirg'ichdan o'tkaziladi va hosil bo'lgan bo'tqa yuzga, ayniqsa dog'lar ustiga suriladi, 30 daqiqa ushlab turilganidan keyin salqin suvda yuvib tashlanadi va oziqlantiruvchi krem suriladi.

Qirg'ichdan o'tkazilgan yerqalampir va olmadan tayyorlangan niqob. Yerqalampir va olmalarni bir xil miqdorda plastik qirg'ichdan o'tkazing. Keyin yuzda 20 daqiqa ushlab turing va salqin suvda yuvib tashlang.

Homiladorlikdan keyin qolgan pigment dog'lardan xalos bo'lish oson emas, ammo maqsad sari intilsangiz va yuzni parvarish qilish protseduralarini har kuni bajarsangiz, natijasini ikki haftadan keyin seza boshlaysiz.