Бундан тўрт кун аввал, терма жамоамиз Австралиядан йирик ҳисобда мағлубиятга учраганда, учинчи ўрин учун Жанубий Корея билан бўладиган учрашувни ўтказилмаслигига ҳам рози бўлиб қолган эдим. Ўйлашимча, Сиз ҳам шундай аҳволга тушгандирсиз.  Аммо,..

Бронза медал учун бахс бошланишига  бир неча соат қолганда кўнгил қурғур яна типирчилай бошлади.  Сизда ҳам шундай бўлгандир. Нима бўлганда ҳам, терма жамоа, терма жамоа экан-да...

Ҳаяжонланаётган бир биз эмас эканмиз. Ўйин бошланиши олдидан, рақиб бош мураббийи Чо Кванг Рэ ҳам у ёқдан, бу ёққа асабийлашиб, юриб турган экан. Ҳа, улар ҳам осон учрашув кутмаяпти шекилли...

 Учрашув худди ярим финалда бўлгани каби бошланди. Яна бизникилар илк дақиқалардан ташаббусни ўз қўлларига олишга ҳаракат қилдилар. Биринчи дақиқанинг ўзидаёқ дарвоза томон зарба беришга ҳам, бурчак тўпи тепишга ҳам улгурдик.  Олдинги ўйинда ҳам худди шундай бўлганди. Ишқилиб охири баҳайр бўлсин.

Бежизга хавотирланмаган эканман. Ўша "кенгуру”лар билан бўлган ўйиндаги сингари орадан бир дақиқа ўтмасдан, корейслар ҳам дарвозамиз томон зарба бердилар. Фақат бу сафар рақиб хато қилганди.

Аммо кейинги ҳужумларда адашмадилар. Бизникилар  адашдилар. Одил Аҳмедовнинг марказий ҳимоячи сифатида яхши ўйин кўрсатаётганини биламиз. Лекин, у ҳам хатолардан суғурта қилиб қўйилмаган. Унинг адашиши жуда аламли бўлди. 19-дақиқада Нестеров биан бирга-бир вазиятга чиқиб кетган Жи Донг Вон осонгина гол киритишга муваффақ бўлди.

28-дақиқада ўтказилган иккинчи голда эса Одил Аҳмедовнинг айби у қадар катта эмасди. Бунга унинг ишончли ҳаракат қилгани эмас, бутун ҳимоя чизиғининг даҳшатли ўйини сабаб қилиб кўрсатишимиз мумкин. Кўпчилик хато қилганда, биргина футболчининг айби у қадар кўзга ташланмайди.

Учинчи голни калладан урдилар...

Қандай ҳолатга тушганингизни тушуниб турибман. Ўзим ундан-да баттарроқ аҳволда эдим. Ишонинг, Сиздан кўра, менга қийинроқ эди. Мана шу шарҳни ёзишим сабабли,  барчасига қўл силтаб қўя олмасдим. Куйиниб, жаҳл билан ўзимни у ёқ, бу ёққа ура олмасдим. Лекин, шуниси ҳам яхши бўлган экан.

Қора тун аро ярқ этган хира ёғду 43-дақиқада кўринди. Гарчанд бизникилар яна бесамар ҳужум уюштираётгандек, корейслар вазиятни тўлкиқ назорат қилиб тургандек кўринган бўлса-да, улар адашдилар. Жанубий Корея терма жамоаси футболчилари темир эмасликларини исботладилар. Олим Навкаровни йиқитган кореялик футболчилар бизга пеналтидан ҳисобни қисқартириш имконини бердилар. Бу имкониятдан Александр Гейнрих ажойиб тарзда фойдалана олди. Биринчи зарбадан урилган гол ҳисобланмаган бўлса-да, Саша руҳан синиб қолмади ва иккинчи уринишни ҳам хотиржамлик билан ниҳоясига етказди.

Биринчи бўлим шу билан ниҳоясига етди.

Иккинчи бўлим буткул ўзгача бошланди. Биз бу мусобақада жамоамиз фақат ташаббусни ўзида сақлаб қолишига ўрганиб қолган эканмиз. Ҳатто, Австралиядан олтита гол ўтказиб юборган ўйинимизда ҳам, фақат тўпни ўзимизда сақлаб турган эдик. Жанубий Корея терма жамоасига қарши иккинчи бўлимда майдонга тушган йигитларимиз, кутилмаганда ташаббусни рақибга бериб, қарши ҳужумда ўйнашни таклиф қилдилар.

Бу услуб фойда берди. Ўз жарима майдонларидан марказ сари силжиган Корея ҳимоясида дарз кетган жойлар кўзга ташлана бошлади. Корейслар ҳимоясидаги мана шундай нозик жойни энг аввало Гейнрих кўрсата олди. Шиддат билан ўнг қанотдан уюштирилган ҳужум натижасида тўп маҳоратли ҳужумчимизга етказиб берилди. Қолганига Сашанинг маҳоратига бахо бериш қолганди фақат. 3-2.

76-дақиқада Олим Новкаров алмаштирилди. .. Майдонга Шавкат Саломов туширилди. Олимга раҳмат айтишимиз керак. У бугунги ўйинда бор кучи билан ҳаракат қилди. Биринчи голга сабабчи бўлди.

Шавкат Саломов майдонга тушгандан сўнг ҳам йигитларимиздаги шиддат яна-да кучайса, кучайдики, асло пасайгани йўқ.Терма жамоамиз қайта ва қайта ҳужумга зўр берарди. Аммо, шундан сўнг бошқа гол кўрмадик. Гарчанд йигитларимиз роса ҳаракат қилган бўлсалар-да, бошқасига кучимиз етмади. Бронза медал ҳам қўлдан кетди. Лекин, яхши мағлубиятга учрадик.

Мағлубиятнинг ҳам яхшиси бўларкан...

Биз учун Осиё Кубоги тугади. Албатта унда кўнгилсиз вазиятлар ҳам бўлди. Аммо, эътибор беринг, 1994 йилдан буён илк марта ўзимиз қатнашган мусобақада охирига қадар қолдик. Бу сафар эрта қайтмадик. Йигитларимиз бизга уч ҳафта давомида ҳақиқий байрам уюштириб бердилар. Гарчанд ярим финал баҳсида даҳшатли мағлубиятга учраб, шокка тушиб қолган бўлсак-да, охирги ўйинда ўша аламли мағлубият айби, бошқа бир муносиб мағлубият билан ювилди. Қизиқ, шунақаси ҳам бўларкан...

Нима бўлган тақдирда ҳам, йигитларимиздан миннатдор бўлишимиз керак. Ҳали улар бизни кўп хурсанд қиладилар. Бунга ишонамиз. Шундай бўлишига умид қиламиз. Футболдан узоқлашманг...

Зафар ҚОСИМОВ