2010 йили футболимиз тарихида илк бора Австралия терма жамоасини мағлубиятга учратиш уддасидан чиқа олгандик. Алексей Евстафеев қўл остидаги Ўзбекистон ўсмирлар терма жамоаси Тошкентда бўлиб ўтган қитъа биринчилиги ярим финалида ўз тенгдошларини 2:1 ҳисобида мағлубиятга учратишганди. Ўша ўйингача ҳеч бир терма жамоамиз "соккеруз”ни мағлуб эта олмаганди. Ҳар доим ҳам мағлубиятга учрайвермаганмиз, Ернинг жанубий қисмидаги "Европанинг бир бўлаги” билан унда-бунда дуранг ҳам ўйнаб турганмиз. Аммо ҳеч қачон ғалаба қозона олмагандик. Ўсмирларимизнинг ўша ғалабасидан кейинги австралияликлар билан илк тўқнашувимиз ҳам бизнинг мағлубиятимиз билан якунига етди. Тўғриси, бундан ҳам баттарроғини одамлар кўришган...



Ҳозир ҳеч кимнинг кўнглига сиғмаётган бўлса ҳам-да... Шу, Қатарда ҳам "Спорт” телеканалимизни кўришяптими, деб ўйлаб қолдим. Австралия ҳамда Ироқ терма жамоалари ўртасидаги учрашувни шарҳлаб борган "Спорт” телеканалининг раҳбарларидан бири Комил Жумаев, қайси мутахассиснинг фикрларига асосланиб бундай дедилар, билмадигу: "Австралия терма жамоасининг ўйин услуби Бразилияникига ўхшаб кетади”, дегандек бўлгандилар. Терма жамоамизнинг сўзга чечан устози: "Австралия Бразилия эмас, Япония Аргентинани мағлуб этганида нима учун биз Австралияни мағлуб эта олмас эканмиз”, деди. Кўринишидан, ҳозирча биз бу жамоани мағлуб эта олмаймиз. Ким билади, балки таркибимизда жароҳати сабаб бугунги ўйинда майдонга туша олмаган Александр Гейнрих ва Игнатий Нестеровлар бўлганида яхшироқ натижага эришармидик...



Австралия терма жамоасига қарши учрашувнинг биринчи бўлимида вакилларимиз мусобақадаги энг ёмон ўйинларини намойиш этишди, дейиш мумкини? Менимча – йўқ. Иордания терма жамоасига қарши чорак финалнинг биринчи ярмида ҳам Абрамов шогирдлар кўп ҳам кўзни қувонтиришмаганди. Ўша учрашувнинг биринчи бўлимида ҳам кайфиятимиз бугунгидек бузилиши мумкин эди, аммо, бахтимизга, иорданияликлар таркибида тўртта футболчимизнинг орасидан эсон-омон чиқиб кетадиган Ҳарри Кьюэлл ва яна тўртта футболчимизнинг қўпол хатосидан фойдаланиб қоладиган Саша Огненовскига ўхшаган футболчи йўқ эди.



Хитойнинг Гуангчжоу шаҳрида бўлиб ўтган 2010 йилги Осиё Ўйинларининг унутилмас қаҳрамонларидан бири Темур Жўраевнинг асосий таркибда майдонга туширилгани кўпчиликка ёқмаган бўлиши мумкин. Нестеров жароҳат олганидан кейин ким ҳам майдонга тушиши мумкин? Албатта, Темур Жўраев. Биринчи бўлимда ўтказиб юборилган иккита голда фақат Темур Жўраев айбдорми? "Кьюэллнинг ўткир бурчакдан йўллаган зарбасини қайтарса бўларди”, деганлар ҳам ўзича ҳақ, аммо бу вазиятда ҳимоячиларимизни ҳақли равишда ортда қолдирган "Галатасарай” ярим ҳимоячисининг маҳорати олдида "Пахтакор” дарвозабони ҳам ҳеч нима қила олмаган бўлса, не ажаб? Осиёнинг 2010 йилги энг яхши ўйинчиси Саша Огненовскининг голи учун жавобгарликни ҳимоячиларимиз ўз елкаларига уялмасдан олишлари мумкин, беҳижолат. Танаффус вақтид "Спорт” телеканали орқали Ўзбекистон хонадонларида "меҳмон” бўлган Тоҳир Кападзе ҳақ гапни айтди: "Йигит ўзининг имконияти даражасида ўйнаяпти”. Иккинчи бўлимда Жўраев, сал қолса, 2011 йилги Осиё Кубогининг ҳам унутилмас қаҳрамонига айланиши мумкин эди, дарвозабонимизнинг бахтига австралиялик футболчи Жўраевдан бундай ҳаракатни кутмаганди, қўшимчасига Анзур Исмоилов вақтида ёрдамга етиб келиб, кескинликни йўқота билди. Темур Жўраев ҳақида бошқа фикр билдириш шарт эмас, менимча.



Агар совуққина статистикага мурожаат қиладиган бўлсак, вакилларимиз тўп устидан рақибимизга нисбатан кўпроқ эгалик қилган бўлиб чиқармиз. Алдамчи манзара, шундай эмасми? Ўйинни жуда ҳам ҳужумкор руҳда бошладик, деярли икки дақиқа давомида тўпни рақибимизга бермадик ва бундан кейин ҳам бермайдигандек тасаввур уйғотдик. Австралия Ўзбекистон миллий терма жамоамизга қарши осонгина ўйин услубини танлади: қарши ҳужум. Вакилларимизни ўз жарима майдончасига киритгани ҳам йўқ, лекин тўпни эгаллагани заҳоти индивидуал жиҳатдан нафақат ушбу қарама-қаршиликнинг, балки бутун мусобақанинг энг яхши ижрочилари ҳисобланган Ҳарри Кьюэлл ҳамда Тим Кэйхиллга етказиб берилаверди. Улар эса истаганларини қилишди...



Энг ёмон ўйинимизда ҳам яхши ўйинчини аниқлаш мумкин, бизнингча. Бу – Одил Аҳмедов. Менимча. Собиқ Иттифоқ терма жамоасига устозлик қилган Валерий Лобановский Евро 88да Голландия терма жамоасидан ўша тарихий, ўша афсонавий мағлубиятни "қабул” қилиб олгач, голландияликларнинг энг асосий футболчиларидан бири, Рууд Гуллит ҳақида шундай деган экан: "Мен бу футболчининг қайси нуқтада ўйнашини била олмадим: ҳимоя, ярим ҳимоя ёки ҳужум?”. Бугун Одил Аҳмедов ҳақида ҳам худди шу фикрни билдириш мумкин. У бешта гол ўтказиб юборган ҳимоямизнинг энг яхши вакили бўлди, у ярим ҳимояда ҳам фаоллик билан ҳаракат қилди, учрашувдаги вакилларимиз эга бўлган энг яхши имкониятларнинг бир қаторини ҳам у, бир ўзи юзага келтирди...



Бир нарсани тан олиш керак, тан олмаса ҳам бўлмайди: вакилларимиз мусобақа давомида ҳали бунақанги кучли рақибга дуч келишмаганди. Бу оқлов бўла оладими? Йўқ. Ҳеч қанақасига!

From hero to zero атиги бир қадам. Бу ўйин ҳақида ҳозир ортиқча фикрнинг кераги ҳам йўқ. Шу ерда тугатса ҳам бўлаверади. Австралия Ўзбекистон миллий терма жамоасини оддийгина ўйин билан мағлубиятга учратди. Бунда ҳеч қандай яширин қурол йўқ, бўлмаган ҳам. Иордания билан ўйиндан кейин ОФК президенти "Ўзбекистоннинг ўйинидан ҳайратдаман!”, деганди, эртага ҳам шундай баёнот чиқиб қолса, албатта, биз ҳайрон қолмаймиз. Шунчаки, бироз алам қилмоқда: ҳеч қачон, Австралия терма жамоасига "атиги” 0:4 ҳисобида имкониятни бой берган, Ҳиндистон терма жамоасига ҳавас қиламан, деб ўйламагандим.

Ҳа-я, бир нарсани эсдан чиқармаслик керак: 0:8дан кейин тўхтамаган ҳаёт 0:6дан кейин ҳам тўхтаб қолмайди. Машҳур мультфильмдаги машҳур сатрларни бироз ўзгартирамиз: "Кўришгунча ҳайр энди, мундиал кутар бизни...”. Кечирасиз, бизни қайси мундиал кутаётганини мен, ҳозирча, аниқ билмайман.