САВОЛ: Ўзбекчиликни энг машҳур жиҳатларидан бири меҳмондўстликдир. Шунингдек “Айтиб келган меҳмон балои Худо, айтмай келган меҳмон атои Худо” деган гаплар ҳам бор. Лекин эшитишимизча, аёл киши эри ўйда йўқлигида бегоналарни киритишга ҳаққи йўқ экан. Шу гап қанчалик рост? ЖАВОБ: Бу ҳам эрнинг ҳақларидан бири, чунки эри йўғида уни ўйига кирган одам туфайли оилага катта зарарлар етиши мумкин, ўша одам ёмон одам бўлса ёлғиз аёлга ёмон кўз билан қараши ёки ёмон ҳаракат қилиши мумкин, оила сирларини ташқарига олиб чиқиши мумкин ёки мутлақо эрига ёқмайдиган, унга душман одам бўлиши ҳам мумкин. ўзини билган ҳар қандай муассаса ва ташкилот ҳам бошлиғининг изнисиз ҳар кимни ўзининг муҳтарам жойларига киритавермайди. Оиланинг энг муҳтарам жойи бўлмиш уйга оила бошлиғининг изнисиз тўғри келган одамни киритавериш, унга ҳурматсизлик қилиш ҳам бўлади. Бу ишни алоҳида таъкидланиши, одатда арзимаган бўлиб кўринган нарса кўпинча оилада уруш жанжал келиб чиқишига, оиланинг бузилиб кетишига сабаб бўлади деганларидандир. Бировни ёмон кўриб қолиш кўнгил иши, эркак одам ўзи ёмон кўрган одамга унинг жуфти ҳалоли, ёстиқдоши томонидан илтифот кўрсатилишини ҳеч кўнглидан чиқара олмаслиги турган гап, шунинг учун ҳам Ислом шариати масалани аёлларга алоҳида таъкидлаб ўқдиради. бу нарсани эрнинг муҳим ҳақларидан бири деб тушунтиради.
