Америкалик роҳиба Ийсо алайҳиссаломнинг ҳақ таълимотини Исломда топди. Энн Холмс Реддинг 25 йилдан буён Американинг Род- Айленд штатидаги епископал черковида роҳиба бўлиб хизмат қилиб келади. Бироқ, бир неча йил аввал унинг ҳаётида туб бурилиш юз берди. Реддинг хоним иймонга мушарраф бўлди .
«Онамнинг ўлимидан қаттиқ қайғурдим . Ўшанда Яратганга сиғинишга, Унга таслим бўлишга, Ундан мадад олишга ўзимда кучли эҳтиёж сездим, - эслайди Реддинг хоним . – Бироқ, дийний унвонга эга бўлсам ҳам, черковда ишлашим ҳам менга бу ҳис-туйғуни бера олмади. Шундан кейин Сиэтлга кўчиб кетдим . У ерда дийнлараро мулоқотга иштирок этишга қарор қилдим. Бунинг учун эса Исломни ўргана бошладим. Мен Исломнинг беназир ойдинлигини кўрдим. Бу Яратганнинг армуғонидан бошқа нарса эмаслигини англаб етдим. Ислом Ийсо алайҳиссаломни Худонинг ўғли эмас, балки пайғамбари деб таълим беради. Насронийлар эса ибодатда у зотни ягона Илоҳга - Ҳолиққа шерик қилиб, чуқур залолат ботқоғига ботадилар».
Энн хонимнинг айтишича, калимаи шаҳодатни айтиб, муслималик билан шарафлангач, Ийсо алайҳиссаломга эргашишни тарк этмаган, аксинча, энди у Ийсо алайҳиссаломнинг асл, ҳақ таълимоти – Тавҳидга эргаша бошлаган. Реддинг хонимни афсуслантираётган биргина нарса шуки , Америка қонунларига биноан у энди оммага дийний маъруза қила олмайди. Бироқ энди собиқ роҳиба исломий маърифат тарқатиш усулларидан фойдаланади. «Ислом менга ҳақиқий бахт ва ҳаётдан асл қониқиш ҳиссини инъом этди», - дейди Энн хоним .

«Насронийлигимда ўзимни Яратганнинг паноҳига топширишга, Унга таслим бўлишга эҳтиёж сезардим, аммо у пайтларда Ислом сўзи айнан «ўзни Роббга таслим қилиш» деган маънони англатиши хаёлимга ҳам келмаган эди. Бу эса менинг бутун умрим давомида излаб юрган нарсам эди», - дейди бахтиёр муслима , собиқ роҳиба Энн Холмс Реддинг хоним YouTube сайтига қўйилган видеолавҳада.

Manba

Феврал ойининг охирида Россияда исломий телеканал ишга тушади . Бу ҳақда 18 январ куни Москва шаҳрида ижтимоий ва диний мусулмон арбоблари билан бўлган учрашувда Россия муфтийлар кенгаши раиси Равил Гайнутдин хабар қилди .
“Ҳозирда якуний технологик ишлар кетмоқда. Бир ойдан сўнг Биринчи исломий канал бизларга нима тақдим этишини ўз кўзимиз билан кўрамиз. Умид қиламанки, бу иш сифатли ва хайрли бўлади”, - деди Р. Гайнутдин .
Шунингдек , учрашувда миллатлараро ва конфессиялараро зиддиятлар ортишининг олдини олиш чора-тадбирлари кўриб чиқилди. РМК раиси сўзларига қараганда, ўтган йили Россиядаги миллатлараро тотувликка солинаётган хавф ҳеч кимни тарк этмаган. Бугунги кунга келиб, бу хавф ҳар доимгидан ҳам кучли бўлиб турган бир пайтда, у Россия ҳукуматининг аниқ расмий баёнотлари ва келгуси ҳаракатларининг аҳамиятини алоҳида таъкидлади.
“Бугунги , яъни Президент ўзаро аҳилликни талаб қилаётган кунда , Бош вазир барчамизни демократик давлат барпо этишда бирдамликка чақирди. Ота-боболаримиз бизга ўз ҳаётлари эвазига фашизм устидан ғалабани тақдим этишди. Қандай қилиб, бутун бир халқимизни ўзимизникилар ва бегоналарга ажратишимиз мумкин?” , - дея алоҳида таъкидлади Россия мусулмонлар диний раҳбари .
Шунинг учун учрашув қатнашчилари Бутун Россия мусулмонлар форуми аҳамияти ҳақида алоҳида тўхталдилар ва РМК бошлиғидан форумнинг ташкилий қисмига раҳбарлик қилишини сўрашди. Уларнинг айтишича, мазкур форум миллатларо тотувликни , шунингдек , жамиятнинг маънавий жиҳатдан жипслашувини таъминлайди .
info.islom